കുലുക്കല്ലൂര്‍: ചുണ്ടമ്പറ്റ ബി.വി.യു.പി. സ്‌കൂളിലെ വിദ്യാര്‍ഥികള്‍ ഒറ്റഞാര്‍ കൃഷിയിറക്കി. സ്‌കൂളിലെ തിരഞ്ഞെടുത്ത പ്ലോട്ടിലാണ് കൃഷിയിറക്കിയത്. മാതൃഭൂമി സീഡ് പദ്ധതിയുമായി ബന്ധപ്പെട്ടാണ് സ്‌കൂളില്‍ കൃഷിനടത്തുന്നത്.
ജൈവവളംമാത്രം ഉപയോഗിച്ചാണ് കൃഷിനടത്തുന്നത്. സ്ഥലത്തെ ജൈവകര്‍ഷകരുടെ ഉപദേശവും തേടുന്നുണ്ട്. ഒറ്റഞാറില്‍ കരകൃഷിയാണ് സ്‌കൂളില്‍ നടപ്പാക്കുന്നത്. മണ്ണുത്തി കാര്‍ഷിക യൂണിവേഴ്‌സിറ്റിയില്‍നിന്ന് കൊണ്ടുവന്ന ജ്യോതി ഇനം നെല്‍വിത്താണ് കൃഷി ചെയ്യുന്നത്. പാട്ടത്തിനെടുത്ത സ്ഥലത്തും കൃഷിയിറക്കി. സ്വുഡോമോണാസ്, ബ്യൂവേറിയ തുടങ്ങിയ ജൈവത്വരകങ്ങളും കൃഷിക്ക് ഉപയോഗിക്കുന്നുണ്ട്.
