അമ്പലപ്പാറ :വഴിയോരങ്ങളില്‍ മരങ്ങളുടെ സംരക്ഷകരായി വിദ്യാര്‍ഥികള്‍. ചെറുമുണ്ടശ്ശേരി എ.യു.പി. സ്‌കൂളിലെ സീഡ്ക്ലബ്ബ് അംഗങ്ങളാണ് മരങ്ങളില്‍ പരസ്യങ്ങള്‍ ആണിയടിച്ച് സ്ഥാപിക്കുന്നതിനെതിരെ രംഗത്തുവന്നത്. സീഡ്‌പോലീസ് ഇടപെട്ടതിനെത്തുടര്‍ന്ന് പരസ്യങ്ങള്‍ സ്ഥാപിച്ചവര്‍തന്നെ ബോര്‍ഡുകള്‍ എടുത്തുമാറ്റി.
അടയ്ക്കാപ്പുത്തൂര്‍-ചെര്‍പ്പുളശ്ശേരി റോഡരികിലെ തണല്‍ മരങ്ങളിലായിരുന്നു ആണിയടിച്ച് പരസ്യങ്ങള്‍ സ്ഥാപിച്ചത്. ഇത് വിദ്യാര്‍ഥികളുടെ ശ്രദ്ധയില്‍പ്പെടുകയും സീഡ് കോ-ഓര്‍ഡിനേറ്റര്‍ എന്‍. അച്യുതാനന്ദന്റെ നേതൃത്വത്തില്‍ ഉടമസ്ഥരെവിളിച്ച് നീക്കം ചെയ്യാനാവശ്യപ്പെടുകയായിരുന്നു. ഞായറാഴ്ച ഒരു വിഭാഗം പരസ്യങ്ങള്‍ നീക്കംചെയ്തു. ശേഷിച്ചവ നീക്കാമെന്ന് ഉറപ്പുലഭിച്ചിട്ടുണ്ട്. സീഡ് റിപ്പോര്‍ട്ടര്‍ ബി.അനശ്വര, കെ.സുനീഷ്‌കുമാര്‍, ഡി.ഗോപീകൃഷ്ണന്‍ എന്നിവര്‍ നേതൃത്വംനല്‍കി.
