ചെത്തല്ലൂര്‍: കളക്ടറുമായി കൂടിക്കാഴ്ച നടത്തിയത് കുട്ടികള്‍ക്ക് പുതിയ അനുഭവമായി.
ചെത്തല്ലൂര്‍ എന്‍.എന്‍.എന്‍.യു.പി. സ്‌കൂളിലെ 'സീഡ് ക്ലബ്ബിന്റെ' ആഭിമുഖ്യത്തില്‍ പാലക്കാട് കളക്ടര്‍ കെ. രാമചന്ദ്രനുമായിട്ടാണ് അഭിമുഖം നടത്തിയത്. സമൂഹത്തിന്റെ എല്ലാ പ്രശ്‌നങ്ങളിലും ഇടപെട്ട് പരിഹരിക്കാന്‍ കഴിയുന്നതരത്തിലുള്ള പുതിയ സമൂഹമാണ് നാടിന്റെ ശക്തിയെന്നും സമൂഹത്തില്‍ അധ്യാപകരുടെ പങ്ക് വളരെ വലുതാണെന്നും കളക്ടര്‍ പറഞ്ഞു. അടിസ്ഥാനതലം മുതല്‍ വായന ശീലമാക്കണമെന്നും വായനയിലൂടെ തനിക്ക് ഒട്ടനവധി നേട്ടമുണ്ടായിട്ടുണ്ടെന്നും കളക്ടര്‍ ചൂണ്ടിക്കാണിച്ചു.
അരമണിക്കൂര്‍ കളക്ടര്‍ കുട്ടികളുമായി സംവദിച്ചു. ദേവദര്‍ശന്‍ ആര്‍. മോഹന്‍ ലളിതഗാനം ആലപിച്ചതോടെയാണ് അഭിമുഖം അവസാനിച്ചത്. കുട്ടികള്‍ക്ക് മധുരപലഹാരങ്ങള്‍ കളക്ടര്‍ നല്‍കി. ആദ്യമായിട്ടാണ് ഇത്തരമൊരു പരിപാടി സംഘടിപ്പിച്ചതെന്ന് പ്രധാനാധ്യാപകന്‍ പി. ഉണ്ണിക്കൃഷ്ണന്‍ പറഞ്ഞു.
