ചെറുപുഴ: നാടന്‍പൂക്കളുടെ വൈവിധ്യം നേരില്‍ കണ്ട് ആസ്വദിക്കാന്‍ ചെറുപുഴ ജെ.എം.യു.പി. സ്‌കൂള്‍ സീഡ് വിദ്യാര്‍ഥികള്‍ നരമ്പില്‍പ്പാറ സന്ദര്‍ശിച്ചു. മറുനാടന്‍ പൂക്കള്‍കൊണ്ട് പൂക്കളം തീര്‍ക്കുന്ന മലയാളികള്‍ക്ക് അന്യമായിക്കൊണ്ടിരിക്കുന്ന കാക്കപ്പൂ, തുമ്പപ്പൂ, അരിപ്പൂ, വട്ടപലം, എള്ളിന്‍പൂവ്, ഓണത്താറ് തുടങ്ങിയ പൂക്കള്‍ കുട്ടികള്‍ പരിചയപ്പെട്ടു. പഴയ തലമുറയിലെ കര്‍ഷകന്‍ പദ്മനാഭന്‍ നമ്പ്യാര്‍ ഓണക്കാല അനുഭവങ്ങള്‍ പങ്കുവെച്ചു. സീഡ് കോ ഓര്‍ഡിനേറ്റര്‍ കെ.ശ്രീപാല്‍, അധ്യാപകരായ റോബിന്‍ വര്‍ഗീസ്, പി.ആര്‍.രൂപിന്‍, വിദ്യാര്‍ഥികളായ അരവിന്ദ്, ഫാത്തിമ കരീം, നീനു വര്‍ഗീസ്, രശ്മി, സുധീഷ്,ആതിര തുടങ്ങിയവര്‍ നേതൃത്വംനല്കി.
