ചെമ്മണ്ണാര്‍: വാര്‍ദ്ധക്യകാലത്തും അധ്യാപനകാലത്തിന്റെ മധുരസ്മരണകള്‍ അയവിറക്കി കഴിയുന്ന സര്‍വീസില്‍നിന്ന് വിരമിച്ച അധ്യാപകര്‍ക്കരികിലെത്തി ചെമ്മണ്ണാര്‍ സെന്റ് സേവ്യേഴ്‌സ് ഹയര്‍ സെക്കന്‍ഡറി സ്‌കൂളിലെ മാതൃഭുമി സീഡ് ക്ലബ്ബ് വിദ്യാര്‍ഥികള്‍ മാതൃക കാട്ടി. പൂച്ചെണ്ടുകളും മധുരപലഹാരങ്ങളും ആശംസാ കാര്‍ഡുകളുമായി വിദ്യാര്‍ഥികള്‍ ദീര്‍ഘദൂരം നടന്ന് അധ്യാപകര്‍ക്കൊപ്പമാണ് പെന്‍ഷന്‍പറ്റിയ അധ്യാപകര്‍ക്കരികിലെത്തിയത്. അധ്യാപകര്‍ തിളങ്ങുന്ന ഓര്‍മ്മകള്‍ കുട്ടികളുമായി പങ്കുവച്ചു. ഓണസദ്യയ്ക്ക് മുന്‍കാല അധ്യാപകരെ വിദ്യാര്‍ഥികള്‍ സ്‌കൂളിലേക്ക് ക്ഷണിക്കുകയും ചെയ്തു. സ്‌കൂള്‍ മാനേജര്‍ ഫാ. ജോര്‍ജ് പാട്ടത്തേക്കുഴി, ഹെഡ്മാസ്റ്റര്‍ ജോസഫ് ജോണ്‍, അധ്യാപകരായ മിനിമോള്‍ അഗസ്റ്റിന്‍, ലീലാമ്മ തോമസ്, ജോര്‍ജ് മാത്യു, സിസ്റ്റര്‍ ലിസി കെ.എസ്, എന്നിവരും സീഡ് ക്ലബ്ബംഗങ്ങള്‍ക്കൊപ്പം മുന്‍കാല അധ്യാപകരുടെ വീടുകള്‍ സന്ദര്‍ശിച്ചു.
