പന്തളം: അന്തരിച്ച മുന്‍ രാഷ്ട്രപതി എ.പി.ജെ.അബ്ദുല്‍ കലാമിന് സീഡ് പ്രവര്‍ത്തകരുടെ പ്രണാമം. പന്തളം എന്‍.എസ്.എസ്. ഇംഗ്ലീഷ് മീഡിയം യു.പി. സ്‌കൂളിലെ സീഡ് പ്രവര്‍ത്തകരാണ് അബ്ദുല്‍ കലാമിന്റെ ചിത്രത്തിനു മുന്നില്‍ പൂക്കള്‍ അര്‍പ്പിച്ചു വണങ്ങിയത്.
പത്രങ്ങളിലെ വാര്‍ത്തകള്‍കൊണ്ട് പ്രദര്‍ശനമൊരുക്കിയും അദ്ദേഹത്തിന്റെ മഹത്വചനങ്ങള്‍ ചാര്‍ട്ടുകളാക്കി പ്രദര്‍ശിപ്പിച്ചും ക്ലാസ്സുകളില്‍ പ്രസംഗം നടത്തിയും അവര്‍ മുന്‍ രാഷ്ട്രപതിയെ അനുസ്മരിച്ചു.
അബ്ദുല്‍ കലാമിനോടുള്ള ആദരസൂചകമായി ഏഴു ദിവസം സ്‌കൂളും പരിസരവും പൊതുസ്ഥലങ്ങളും ശുചീകരിക്കാനും കുട്ടികള്‍ തീരുമാനിച്ചിട്ടുണ്ട്. മാതൃഭൂമിയുടെ ലൗ പ്ലാസ്റ്റിക് പദ്ധതി കോട്ടയത്ത് ഉദ്ഘാടനം ചെയ്ത് നടത്തിയ പ്രസംഗവും കുട്ടികള്‍ ഓര്‍ത്തെടുത്തു.
പ്രിന്‍സിപ്പല്‍ എസ്.ലീലാമ്മ, സീഡ് കോ-ഓര്‍ഡിനേറ്റര്‍ വി.ശ്രീജിത്ത്, സ്റ്റാഫ് സെക്രട്ടറി വി.രാജേഷ്‌കുമാര്‍ എന്നിവര്‍ നേതൃത്വം നല്‍കി.
