ഒറ്റപ്പാലം: മുന്‍കരുതലും നല്ല ജീവിതശൈലിയും മതി, രോഗത്തെ അകറ്റിനിര്‍ത്താമെന്ന് ഓര്‍മിപ്പിക്കുകയാണ് ഈ കുട്ടികല്‍. മഴക്കാലരോഗങ്ങള്‍ക്കെതിരെ ചെറുമുണ്ടശ്ശേരി ഹരിതം സീഡ് ക്ലബ്ബാണ് 'ശുചിത്വം പരിപാലിക്കൂ, രോഗങ്ങളെ അകറ്റൂ'വെന്ന സന്ദേശവുമായി ജാഗ്രത എന്ന കര്‍മപരിപാടിയുമായി രംഗത്തെത്തിയത്. പി.ടി.എ. യോഗത്തില്‍ ശുചിത്വസന്ദേശം സ്വീകരിച്ച് പഞ്ചായത്തംഗം പി. മുഹമ്മദ് കാസീം ഉദ്ഘാടനം നിര്‍വഹിച്ചു. മുഴുവന്‍ രക്ഷിതാക്കള്‍ക്കും സന്ദേശം വിതരണംചെയ്തു.
ജൂനിയര്‍ റെഡ്‌ക്രോസിന്റെ സഹകരണത്തോടെ സീഡ് പോലീസ് ഗ്രാമത്തിലെ വീടുകളില്‍ ബോധവത്കരണവും നടത്തുന്നുണ്ട്. യോഗത്തില്‍ എന്‍ഡോവ്‌മെന്റ് വിതരണവും നിര്‍ധന വിദ്യാര്‍ഥികള്‍ക്ക് പഠനോപകരണ വിതരണവും നടന്നു. പ്രധാനാധ്യാപിക കെ. ചന്ദ്രിക, പഞ്ചായത്തംഗം കെ. വേലായുധന്‍, കെ.എം. ഗോവിന്ദമാരാര്‍, വി. വാസുദേവന്‍, ടി. പ്രകാശ്, സീഡ് കോ-ഓര്‍ഡിനേറ്റര്‍ എന്‍. അച്യുതാനന്ദന്‍ എന്നിവര്‍ പ്രസംഗിച്ചു.
