വെച്ചൂച്ചിറ: ജവഹര്‍ നവോദയ വിദ്യാലയത്തിലെ മാതൃഭൂമി സീഡ് ക്ലബ് അംഗങ്ങള്‍ ചൊള്ളനാവയല്‍ ആദിവാസി കോളനി സന്ദര്‍ശിച്ചു. കോളനിയിലെ കമ്മ്യൂണിറ്റി ഹാളില്‍ കൂടിയ ആദിവാസികളെ അഭിസംബോധന ചെയ്ത പ്രിന്‍സിപ്പല്‍ സി.രാമകൃഷ്ണന്‍ നവോദയ വിദ്യാലയത്തിന്റെ ഉദ്ദേശ്യലക്ഷ്യങ്ങള്‍ വിശദീകരിച്ചു.
ആദിവാസികള്‍ സീഡ് അംഗങ്ങള്‍ക്കുവേണ്ടി അവരുടെ തനതുകലകള്‍ അവതരിപ്പിച്ചു. തുടര്‍ന്ന് അരി, പയര്‍ പഞ്ചസാര തുടങ്ങിയവ വിതരണം ചെയ്തു.
വിദ്യാര്‍ഥികള്‍ കോളനിയിലെ വീടുകള്‍ സന്ദര്‍ശിച്ച് സോപ്പ്, പേസ്റ്റ്, പൗഡര്‍ തുടങ്ങിയവയും നല്‍കി. കൂടാതെ രോഗികള്‍ക്ക് സാമ്പത്തിക സഹായവും കുട്ടികള്‍ക്ക് മിഠായി വിതരണവും നടത്തി.
അഞ്ചു ഷാജി, രേവതിരാജ്, അക്ഷയ് കൃഷ്ണ, സെന്‍ റജിഎബ്രഹാം എന്നിവരുടെ നേതൃത്വത്തില്‍ 26 കുട്ടികള്‍ പങ്കെടുത്തു. സീഡ് കോ-ഓര്‍ഡിനേറ്റര്‍ ഗീതാ കുമാരി, വത്സമ്മ തോമസ്, സാംകുട്ടി ഡി.എസ്, സൂര്യലക്ഷ്മി തുടങ്ങിയ അദ്ധ്യാപകരും പങ്കെടുത്തു.
