ഒറ്റപ്പാലം: കടമ്പൂര്‍ ഗവ. ഹയര്‍സെക്കന്‍ഡറി സ്‌കൂള്‍ സീഡ് ക്ലബ്ബിന്റെ മൈ ട്രീ ചലഞ്ച് ഏറ്റെടുത്ത് ഗ്രാമങ്ങളും വൃക്ഷത്തൈ സംരക്ഷിക്കാന്‍ രംഗത്ത്. കീഴൂര്‍ യുവതരംഗ് ക്ലബ്ബാണ് വൃക്ഷത്തൈകള്‍ നട്ട് കെ.എസ്. സലീഖ എം.എല്‍.എ.യ്ക്കും മനിശ്ശീരി അലൈഡ് കോളേജിനും ചലഞ്ച് നല്‍കിയത്.
ഷൊറണൂര്‍ മണ്ഡലത്തെ മുഴുവന്‍ ഈ യജ്ഞത്തില്‍ പങ്കാളിയാക്കുക എന്ന ലക്ഷ്യത്തോടെയാണ് ആഞ്ഞിലിമരം നട്ട് കെ. മുകുന്ദന്‍ കെ.എസ്. സലീഖ എം.എല്‍.എ.യ്ക്കും കെ. ശ്രീജിത്ത് മാവിന്‍തൈ നട്ട് മനിശ്ശീരി അലൈഡ് കോളേജിനും വൃക്ഷത്തൈ നടാന്‍ വെല്ലുവിളി നല്‍കിയത്. കടമ്പൂര്‍ ഹൈസ്‌കൂളിലെ സീഡ് കോ-ഓര്‍ഡിനേറ്റര്‍ കെ. സതീഷ്‌കുമാര്‍ വൃക്ഷത്തൈകള്‍ കൈമാറി.
ക്ലബ്ബ് പ്രസിഡന്റ് കെ. സജിത്, സെക്രട്ടറി കെ. വിപിന്‍ദാസ്, എ. സന്തോഷ്‌കുമാര്‍, കെ. ശ്രീനിവാസന്‍, കെ. രാമചന്ദ്രന്‍ എന്നിവര്‍ പ്രസംഗിച്ചു. യുവതരംഗ് ക്ലബ്ബ് പരിസ്ഥിതി പ്രവര്‍ത്തകന്‍ കല്ലൂര്‍ ബാലന്റെ സഹകരണത്തോടെ പരിസ്ഥിതിദിനത്തില്‍ 101 വൃക്ഷത്തൈ നട്ടിരുന്നു.
