സ്വീകരിക്കാന്‍ കുരുന്നുകളുടെ മേളം; ആഘോഷമായി കുട്ടിക്കര്‍ഷകരുടെ നൃത്തം

കടക്കരപ്പള്ളി: ആരോഗ്യദായകമായ കൃഷിരീതികളുമായി കടക്കരപ്പള്ളിയില്‍ 'ഹരിതാമൃതം' പദ്ധതിയുടെ ഉദ്ഘാടനത്തില്‍ നിറഞ്ഞത് കുരുന്നുകള്‍. അതിഥികളെ സ്വീകരിക്കാന്‍ മേളം ഒരുക്കിയത് കടക്കരപ്പള്ളി ഗവണ്‍മെന്റ് എല്‍.പി. സ്‌കൂളിലെ കുട്ടികള്‍. ഇതിനൊപ്പം ഉദ്ഘാടനത്തിന് മുമ്പായി സ്‌കൂളിലെ കുട്ടികള്‍ പാരമ്പര്യ കര്‍ഷകവേഷത്തില്‍ ഒരുക്കിയ കര്‍ഷകനൃത്തവും ആഘോഷമായി.
പോലീസിനൊപ്പം ചടങ്ങിന് സുരക്ഷയൊരുക്കിയത് കണ്ടമംഗലം ഹയര്‍ സെക്കന്‍ഡറി സ്‌കൂളിലെ എസ്.പി.സി. കാഡറ്റുകളായിരുന്നു. കടക്കരപ്പള്ളി യു.പി.ജി.എസ്., കണ്ടമംഗലം എച്ച്.എസ്., ഹയര്‍ സെക്കന്‍ഡറി സ്‌കൂള്‍, തങ്കി സെന്റ് ജോര്‍ജ് എച്ച്.എസ്. എന്നിവിടങ്ങളില്‍ മാതൃഭൂമി സീഡ് കുടുംബാംഗങ്ങളും ചടങ്ങില്‍ പങ്കെടുക്കാനെത്തിയിരുന്നു.