എഴുകോണ്‍: മൂപ്പെത്തിയ കതിര്‍മണികള്‍ സ്വര്‍ണവര്‍ണം ചാര്‍ത്തിയ നെല്‍പ്പാടത്തിലെ കൊയ്ത്ത് മാതൃഭൂമി സീഡിന്റെ കുട്ടിക്കൂട്ടത്തിന് ആഹ്ലാദ നിമിഷങ്ങളായി. വാക്കനാട് ഗവ.ഹയര്‍ സെക്കന്‍ഡറി സ്‌കൂളിലെ സീഡ് യൂണിറ്റ് കൃഷിചെയ്ത പാടശേഖരത്തിലാണ് വിദ്യാര്‍ഥികളുടെയും അധ്യാപകരടെയും നാട്ടുകാരുടെയും കൂട്ടായ്മ കൊയ്ത്ത് നടത്തിയത്.
സീഡ് യൂണിറ്റിന്റെ ആദരം ഏറ്റുവാങ്ങിയ മുതിര്‍ന്ന കര്‍ഷകനും മരമടി ജേതാവുമായ ഫിലിപ്പോസ് ചേട്ടനും ഒപ്പം കൂടി. കരീപ്ര കൃഷിഭവനില്‍നിന്നുള്ള സിങ്കേതിക സഹായവും ഉണ്ടായി.
ജില്ലാ പഞ്ചായത്ത് അംഗം സിന്ധു രാജേന്ദ്രന്‍ കൊയ്ത്തുത്സവം ഉദ്ഘാടനം ചെയ്തു.
കരീപ്ര ഗ്രാമപ്പഞ്ചായത്ത് പ്രസിഡന്റ് എന്‍.ലീലാമണി അധ്യക്ഷത വഹിച്ചു.
കൃഷി ഓഫീസര്‍ രാജന്‍ബാബു, ബ്ലോക്ക് പഞ്ചായത്ത് അംഗം വി.കെ.ആദര്‍ശ്കുമാര്‍, ഗ്രാമപ്പഞ്ചായത്ത് അംഗങ്ങളായ ടി.സി.പുഷ്പകുമാരി, ടി.എസ്.ഓമനക്കുട്ടന്‍, പ്രിന്‍സിപ്പല്‍ പി.സുരേന്ദ്രനാഥ്, ഹെഡ്മിസ്ട്രസ് എം.കെ.ശ്യാമളകുമാരി, പി.ടി.എ. പ്രസിഡന്റ് സി.ശിവശങ്കരപ്പിള്ള, മുണ്ടൂര്‍ തുളസി, എം.ഉണ്ണിക്കൃഷ്ണന്‍, സീഡ് കോ- ഓര്‍ഡിനേറ്റര്‍മാരായ കെ.എന്‍.ഉഷ, എസ്.ബിസ്മില്ലാഖാന്‍, സ്റ്റാഫ് സെക്രട്ടറി എല്‍.അജിതകുമാരി തുടങ്ങിയവര്‍ സംസാരിച്ചു.
