കരുനാഗപ്പള്ളി: വൃദ്ധസദനത്തിലെ അന്തേവാസികള്‍ക്ക് സഹായ ഹസ്തവുമായി പാവുമ്പ ഹൈസ്‌കൂളിലെ സീഡ് പ്രവര്‍ത്തകര്‍.
ചങ്ങന്‍കുളങ്ങരയിലെ സായീശം വൃദ്ധസദനത്തിലെ അന്തേവാസികള്‍ക്കാണ് സഹായവുമായി വിദ്യാര്‍ഥി സംഘമെത്തിയത്. അവശത അനുഭവിക്കുന്നവരോടുള്ള പ്രതിബദ്ധത കാത്തുസൂക്ഷിക്കുക എന്ന ലക്ഷ്യവുമായി സ്‌കൂളിലെ മാതൃഭൂമി സീഡ് പ്രവര്‍ത്തകര്‍ വയോധികര്‍ക്ക് ഒരുകൈ സഹായമെന്ന പദ്ധതിക്ക് തുടക്കമിട്ടിരുന്നു. പദ്ധതിയിലൂടെ സമാഹരിച്ച അരിയും, ഭക്ഷ്യവസ്തുക്കളും പണവും വൃദ്ധസദനം നടത്തുന്ന ട്രസ്റ്റിന് കൈമാറി.
തുടര്‍ന്ന് അവര്‍ അന്തേവാസികള്‍ക്കൊപ്പം ചെലവഴിച്ചു. സ്‌കൂളിലെ സീഡ് കോ-ഓര്‍ഡിനേറ്റര്‍ വൃന്ദയുടെ നേതൃത്വത്തിലാണ് വിദ്യാര്‍ഥികള്‍ എത്തിയത്.
