ഇടമറ്റം: ഹരിതഭൂമിക്ക് ഹൃദയം നിറഞ്ഞ ആശംസകള്‍ നേര്‍ന്ന് 'സീഡ് അംഗങ്ങള്‍ 'ഹരിതഭൂമിക്കൊരു കൈയൊപ്പ്' എന്ന പേരില്‍ തയ്യാറാക്കിയ സി.ഡി. പ്രകാശനം ചെയ്തു. ഇടമറ്റം കെ.റ്റി.ജെ. എം.എച്ച്.എസ്സിലെ 'സീഡ് നേച്ചര്‍ ക്ലബ്ബാണ് സി.ഡി. തയ്യാറാക്കിയത്.
പാലാ എ.എസ്.ഐ. ഷാജി സെബാസ്റ്റ്യന്‍ സീഡ് എക്‌സിക്യൂട്ടീവ് അനുരാജിന് സി.ഡി.കൈമാറി പ്രകാശനം ചെയ്തു. ഗ്രാമപ്പഞ്ചായത്ത് പ്രസിഡന്റ് പ്രസാദ് കൊണ്ടൂപ്പറമ്പില്‍ അധ്യക്ഷത വഹിച്ചു.
ഭൂമിയുടെ സന്തുലിതാവസ്ഥ നിലനിര്‍ത്താന്‍ മരങ്ങള്‍ വച്ചുപിടിപ്പിക്കണമെന്നും ഒരു മരം വെട്ടിയാല്‍ പകരം ഒരു മരം നടണമെന്നുമുള്ള സന്ദേശമാണ് സി.ഡി.യുടെ ഉള്ളടക്കം.
സ്‌കൂള്‍ അങ്കണത്തിലെ ഹരിതശോഭയെ കേന്ദ്രീകരിച്ച് തയ്യാറാക്കിയ ഡോക്യുമെന്ററിക്ക് 10 മിനുട്ട് 40 സെക്കന്‍ഡ് ദൈര്‍ഘ്യമുണ്ട്. അഭിനയവും ശബ്ദവും നല്‍കിയത് കുട്ടികള്‍ തന്നെയാണ്. സി.ജെസി ജോസഫ്, സീഡ് പ്രവര്‍ത്തകര്‍ തുടങ്ങിയവര്‍ നേതൃത്വം നല്‍കി.
മിനി ആന്റണി സ്വാഗതവും ലീന ചാക്കോ നന്ദിയും പറഞ്ഞു.
