കൊല്ലം: കൊല്ലം അഞ്ചാലുംമൂട് ഗവണ്‍മെന്റ് ഹയര്‍ സെക്കന്‍ഡറി സ്‌കൂളില്‍ സീഡ് പരിസ്ഥിതി ക്ലബ്ബിന്റെ ആഭിമുഖ്യത്തില്‍ ജില്ലാ ശാസ്ത്ര പ്രവൃത്തിപരിചയമേളയില്‍ വിജയികളായ വിദ്യാര്‍ത്ഥികളുടെ ശാസ്ത്ര പ്രദര്‍ശനവും തിരുവനന്തപുരം സെന്റര്‍ ഫോര്‍ റിസര്‍ച്ച് എഡ്യൂക്കേഷന്‍ ഏര്‍പ്പെടുത്തിയ മികച്ച അധ്യാപകനുള്ള ശിവദാസന്‍പിള്ള സ്മാരക അവാര്‍ഡ് ജേതാവ് ദേവിപ്രസാദ് ശേഖറിനെ ആദരിക്കലും നടന്നു.
ചടങ്ങില്‍ എസ്.എസ്. ജി. ചെയര്‍മാന്‍ അശോകന്‍ അധ്യക്ഷനായി. വാര്‍ഡ് മെമ്പര്‍ ശാന്തകുമാരി ഉദ്ഘാടനം നിര്‍വഹിച്ചു. ഹെഡ്മാസ്റ്റര്‍ കെ. പ്രസാദ്,എസ്.എം. സി. അംഗം രാധാകൃഷ്ണപിള്ള, മാതൃഭൂമി റിസര്‍ച്ച് മാനേജര്‍ ജയപ്രകാശ് എന്നിവര്‍ ആശംസയര്‍പ്പിച്ചു. ജില്ലാ പഞ്ചായത്ത് മുന്‍ അംഗം പുന്തല മോഹന്‍ പുരസ്‌കാര ജേതാവിനെ പൊന്നാടയണിയിച്ച് ആദരിച്ചു.
സ്റ്റാഫ് സെക്രട്ടറി സുരേഷ് ബാബു സ്വാഗതവും മാതൃഭൂമി സീഡ് കോ-ഓര്‍ഡിനേറ്റര്‍ ബി. കൃഷ്ണകുമാര്‍ നന്ദിയും പറഞ്ഞു.
ചടങ്ങിനോടനുബന്ധിച്ച് സബ്ജില്ലാ ശാസ്ത്രമേളയില്‍ ഒന്നാംസ്ഥാനം നേടിയ, സീഡിന്റെ എട്ടിനം പ്രവര്‍ത്തനമേഖലകളെ അധികരിച്ച് നിര്‍മ്മിച്ച 'ചൊവ്വയിലേക്കൊരു ടിക്കറ്റ്' എന്ന ശാസ്ത്രനാടകവും അവതരിപ്പിച്ചു.
ജില്ലാ ശാസ്ത്രമേളയില്‍ അഞ്ചാലുംമൂട് സ്‌കൂളില്‍നിന്ന് വിദ്യാര്‍ത്ഥികള്‍ അവതരിപ്പിച്ച ഇനങ്ങളുടെ പ്രദര്‍ശനവും ഉണ്ടായിരുന്നു.
