കായലോരത്തെ കരനെല്‍ക്കൃഷിയില്‍ നൂറുമേനി

 പട്ടംതുരുത്ത്: അഷ്ടമുടി കായലോരത്തെ കരനെല്‍ക്കൃഷിയില്‍ നൂറുമേനി വിളവ്. മണ്‍റോത്തുരുത്ത് ഗ്രാമപ്പഞ്ചായത്ത് കൃഷിഭവനില്‍ ആത്മാപദ്ധതി പ്രകാരം തെങ്ങിന്റെ ഇടവിളയായി നടത്തിയ നെല്‍ക്കൃഷിയാണ് നൂറുമേനി വിളഞ്ഞത്. മുന്‍ പഞ്ചായത്ത് അംഗം പട്ടംതുരുത്ത് മണപ്പുറത്ത് എല്‍.കുമാറിന്റെ ഒരു ഹെക്ടറോളം തെങ്ങിന്‍തോപ്പില്‍ ഇടവിളയായാണ് കരനെല്‍ക്കൃഷി നടത്തിയത്. നൂറ്റിപത്ത് ദിവസംകൊണ്ട് വിളവെടുപ്പിന് പ്രായമാകുന്ന 'ഉമ'യിനത്തില്‍പ്പെട്ട വിത്താണ് കൃഷി ചെയ്തത്.
മണ്‍റോത്തുരുത്ത് കൃഷി ഓഫീസര്‍ ഷിബുകുമാറിന്റെ വിദഗേ്ദ്ധാപദേശമനുസരിച്ച് ജൈവ വളപ്രയോഗ രിതിയിലാണ് കൃഷി നടത്തിയത്. കൃഷിച്ചെലവിനായി ചെറിയ സാമ്പത്തിക സഹായവും കൃഷിഭവനില്‍നിന്ന് നല്‍കുന്നുണ്ട്. കരനെല്‍ക്കൃഷി വമ്പിച്ച വിജയമായതിനെ തുടര്‍ന്ന് വിളവെടുപ്പുത്സവം നടത്തി. ഗ്രാമപ്പഞ്ചായത്ത് പ്രസിഡന്റ് എസ്.ശോഭ വിളവെടുപ്പുത്സവം ഉദ്ഘാടനം ചെയ്തു. കൃഷി ഓഫീസര്‍ ഷിബുകുമാര്‍ അധ്യക്ഷത വഹിച്ചു.