സീഡിന്റെ പെരുമയുയര്‍ത്തി അധ്യാപകപുരസ്‌കാരം
Posted By : knradmin On 10th September 2013
കണ്ണൂര്‍:മികച്ച അധ്യാപകര്‍ക്കുള്ള സംസ്ഥാനപുരസ്‌കാരം വിതരണം ചെയ്തപ്പോള്‍ മാതൃഭൂമി സീഡിനും അഭിമാനിക്കാനേറെ. സീഡ് കോ ഓര്‍ഡിനേറ്റര്‍മാരും മികച്ച അധ്യാപകരായി തിരഞ്ഞെടുക്കപ്പെട്ടു. കഴിഞ്ഞ വര്‍ഷത്തെ മുഴുവന്‍ അധ്യാപക പുരസ്‌കാരങ്ങളും ഈ വര്‍ഷത്തെ ഹയര്‍ സെക്കന്‍ഡറി, വൊക്കേഷണല്‍ ഹയര്‍ സെക്കന്‍ഡറി വിഭാഗങ്ങളിലെ പുരസ്‌കാരങ്ങളുമാണ് വ്യാഴാഴ്ച കണ്ണൂരില്‍ വിതരണം ചെയ്തത്. ഈ വര്‍ഷത്തെ മികച്ച അധ്യാപകര്‍ക്കുള്ള പുരസ്‌കാരം നേടിയ കൊല്ലം വെണ്ടാര്‍ വിദ്യാധിരാജ വൊക്കേഷണല്‍ ഹയര്‍ സെക്കന്‍ഡറി സ്‌കൂളിലെ പി.എ.സജിമോന്‍, കാസര്‍കോട് ചട്ടഞ്ചാല്‍ ഹയര്‍ സെക്കന്‍ഡറി സ്‌കൂളിലെ പി.രതീഷ്‌കുമാര്‍, പേരാമ്പ്ര ഹയര്‍ സെക്കന്‍ഡറി സ്‌കൂളിലെ ഡോ. ഇ.വി.അബ്ദുള്ള എന്ന അബ്ദുള്ള പലേരി, കഴിഞ്ഞ വര്‍ഷത്തെ പുരസ്‌കാരം നേടിയ പിലിക്കോട് സി.കൃഷ്ണന്‍ നായര്‍ സ്മാരക ഗവ. ഹയര്‍സെക്കന്‍ഡറി സ്‌കൂളിലെ കെ.ജയചന്ദ്രന്‍ എന്നിവര്‍ പുരസ്‌കാരം വിദ്യാഭ്യാസമന്ത്രി പി.കെ.അബ്ദുറബ്ബില്‍നിന്ന് ഏറ്റുവാങ്ങി. മൂവരും സീഡ് കോ ഓര്‍ഡിനേറ്റര്‍മാരാണ്. തിരുവനന്തപുരം വെങ്ങാനൂര്‍ ഹയര്‍ സെക്കന്‍ഡറി സ്‌കൂള്‍ ഫോര്‍ ഗേള്‍സിലെ സീഡ് കോ ഓര്‍ഡിനേറ്റര്‍ കെ.ആര്‍.സുരേഷ്‌കുമാറും ഈ വര്‍ഷത്തെ അധ്യാപകപുരസ്‌കാര ജേതാവാണ്. അദ്ദേഹമടക്കമുള്ള മറ്റു പുരസ്‌കാരജേതാക്കള്‍ക്ക് ഒരു മാസത്തിനുള്ളില്‍ പ്രത്യേക ചടങ്ങ് സംഘടിപ്പിച്ച് പുരസ്‌കാരം കൈമാറും.