കുടുംബകൃഷിയില്‍ വിജയവുമായി സീഡ്
Posted By : tcradmin On 7th February 2015
എടതിരിഞ്ഞി: എടതിരിഞ്ഞി എച്ച്.ഡി.പി. ഇംഗ്ലീഷ് മീഡിയം സ്‌കൂളിലെ സീഡ് ക്ലബ്ബിന്റെ നേതൃത്വത്തില്‍ നടത്തിവരുന്ന കുടുംബകൃഷിയെ വിലയിരുത്തി വിജയികള്‍ക്ക് സമ്മാനങ്ങള്‍ വിതരണം ചെയ്തു. സീഡ് ക്ലബ്ബിന്റെ നേതൃത്വത്തില്‍ മൂന്ന് ഘട്ടങ്ങളിലായിട്ടാണ് കാര്‍ഷിക പ്രവര്‍ത്തനങ്ങള്‍ നടത്തുന്നത്. ഒന്നാം സ്ഥാനം നേടിയ അണ്ടിക്കോട്ട് സന്തോഷിന്റെ കുടുംബത്തിന് നല്‍കിയ സമ്മാനം അഭിമന്യൂവും അമ്മ സരിതയും സമാജം ഭാരവാഹിയും കര്‍ഷകനുമായ സുബ്രഹ്മണ്യന്‍ പടിഞ്ഞാറക്കരയിലില്‍ നിന്നും ഏറ്റുവാങ്ങി.
രണ്ടാം സ്ഥാനം നേടിയ കോലാന്ത്ര ബൈജുവിനും കുടുംബത്തിനുമുള്ള സമ്മാനം അനന്തുവും അമ്മ റാണിയും ഏറ്റുവാങ്ങി. പ്രോത്സാഹന സമ്മാനങ്ങള്‍ നേടിയ കാര്യേഴത്ത് രഞ്ജിത്തിന് ലഭിച്ച സമ്മാനം നീരജും അമ്മ നിബിയും, മാടത്തിങ്കല്‍ സുദീപിന് ലഭിച്ച സമ്മാനം ദേവീ നന്ദനയും അമ്മ സൈബിയും ഏറ്റുവാങ്ങി.
സമാജം പ്രസിഡന്റ് ഭരതന്‍ കണ്ടേങ്കാട്ടില്‍ ആദ്ധ്യക്ഷ്യം വഹിച്ചു. കോ-ഓര്‍ഡിനേറ്റര്‍ പി. ശ്രീദേവി, പ്രിന്‍സിപ്പല്‍ ടി.ജെ. ബിനി, പി.ടി.എ. പ്രസിഡന്റ് സുഭാഷ് ചന്ദ്രന്‍ തുടങ്ങിയവര്‍ സംസാരിച്ചു.