കര്‍ഷകദിനാചരണത്തോടനുബന്ധിച്ച് നടന്ന പോത്തുപൂട്ട്
Posted By : pkdadmin On 20th August 2014
തിരുവേഗപ്പുറ: കാര്‍ഷികസംസ്‌കാരത്തിന്റെ തനിമ വിളിച്ചോതി സ്‌കൂള്‍പറമ്പില്‍ പോത്തുപൂട്ട് നടത്തി. ചെമ്പ്ര സി.യു.പി. സ്‌കൂളിലാണ് 'മാതൃഭൂമി സീഡ് ക്ലബ്ബി'ന്റെ നേതൃത്വത്തില്‍ വേറിട്ട പ്രവര്‍ത്തനങ്ങളിലൂടെ കര്‍ഷകദിനാചരണം സംഘടിപ്പിച്ചത്.
ചെമ്പ്രയിലെ കര്‍ഷകനായ യൂസഫാണ് സ്‌കൂള്‍ഗ്രൗണ്ടിനോട് ചേര്‍ന്ന പറമ്പില്‍ കുട്ടികള്‍ക്കായി പോത്തുപൂട്ട് നടത്തിയത്. പഴയകാല കാര്‍ഷികപ്രവൃത്തികളെക്കുറിച്ച് കുട്ടികള്‍ക്ക് വിശദീകരിക്കുകയും ചെയ്തു.
കാര്‍ഷികപ്രദര്‍ശനം, പച്ചക്കറികള്‍ ഉപയോഗിച്ച് ഭൂപടം നിര്‍മിക്കല്‍ തുടങ്ങിയ പ്രവര്‍ത്തനങ്ങളും നടത്തി. കാര്‍ഷിക ക്ലബ്ബ് ഉള്‍പ്പെടെയുള്ള സ്‌കൂളിലെ മറ്റ് ക്ലബ്ബുകളും പരിപാടികള്‍ക്ക് നേതൃത്വംനല്‍കി.
വാര്‍ഡ് മെമ്പര്‍ മണികണ്ഠന്‍ ഉദ്ഘാടനം നിര്‍വഹിച്ചു. പി.ടി.എ. പ്രസിഡന്റ് പി.കെ. സതീശന്‍ അധ്യക്ഷനായി. പ്രധാനാധ്യാപിക വി.പി.ഉഷ, സീഡ് കോഓര്‍ഡിനേറ്റര്‍ അരുണ്‍, രാജി, മുരളി, നൂര്‍മുഹമ്മദ്, മുനീര്‍ എന്നിവര്‍ സംസാരിച്ചു.