പാലക്കാട്:സ്‌നേഹം നിറയ്ക്കും, ഈ പഠനോപകരണങ്ങൾ

ഒറ്റപ്പാലം: കൊച്ചുകൂട്ടുകാർ ഒരുമിച്ചപ്പോൾ സഹപാഠികൾക്ക് സാന്ത്വനത്തിന്റെ സ്‌നേഹസ്പർശമായി.
സഹപാഠികൾക്ക് പഠനോപകരണമെത്തിച്ച് മാതൃകയാവുകയാണ്  അമ്പലപ്പാറ ചെറുമുണ്ടശ്ശേരി എ.യു.പി. സ്‌കൂളിലെ ഹരിതം സീഡ് ക്ലബ്ബ്. വിദ്യാർഥികൾ സ്വരൂപിച്ച നാണയത്തുട്ടുകളും നാട്ടുകാരുടെയും സ്ഥാപനങ്ങളുടെയും സഹായവും ചേർന്നപ്പോൾ 40 വിദ്യാർഥികൾക്ക് പഠനോപകരണമായി.
പി.ടി.എ. യോഗത്തിൽ പഞ്ചായത്തംഗം കെ. വേലായുധൻ വിതരണം നിർവഹിച്ചു. പഞ്ചായത്തംഗം പി. മുഹമ്മദ് കാസിം, പ്രധാനാധ്യാപിക ഇന്ദിര, കെ. സേതുമാധവമേനോൻ, ടി. സദാനന്ദൻ, ടി. പ്രകാശ്, സീഡ് കോഓർഡിനേറ്റർ അച്യുതാനന്ദൻ എന്നിവർ പ്രസംഗിച്ചു. എൻഡോവ്‌മെന്റ് വിതരണവും നടന്നു.