മരങ്ങള്‍ക്ക് സാന്ത്വനമേകി സീഡ് ക്ലബ് അംഗങ്ങള്‍
Posted By : klmadmin On 21st March 2014
കൊട്ടാരക്കര: മൈലം ഗ്രാമപ്പഞ്ചായത്തിലെ റോഡരികില്‍ നില്‍ക്കുന്ന മരങ്ങളിലെ പരസ്യബോര്‍ഡുകളുടെ കണക്കെടുത്ത് താമരക്കുടി ശിവവിലാസം വൊക്കേഷണല്‍ ഹയര്‍ സെക്കന്‍ഡറി സ്‌കൂളിലെ മാതൃഭൂമി സീഡ് വളണ്ടിയേഴ്‌സ് പഞ്ചായത്ത് പ്രസിഡന്റിന് കൈമാറി. സൈക്കിളില്‍ അഞ്ച് സംഘങ്ങളായി പഞ്ചായത്തിലെ എല്ലാ ഭാഗങ്ങളിലും സഞ്ചരിച്ചാണ് കണക്കെടുപ്പ് നടത്തിയത്. മാതൃഭൂമി സീഡിന്റെ ഫ്രീ ദ ട്രീ കാമ്പെയിന്‍ പരിപാടിയുടെ ഭാഗമായിരുന്നു ഇത്.
മരത്തില്‍ ആണിയടിക്കുന്നതിനെതിരെ സീഡ് അംഗങ്ങള്‍ തീരുമാനിച്ചതിന്റെ അടിസ്ഥാനത്തിലാണ് സ്‌കൂള്‍ അധികൃതര്‍ പഞ്ചായത്ത് പ്രസിഡന്റിനും സെക്രട്ടറിക്കും നിവേദനം നല്‍കിയത്. വിദ്യാര്‍ഥികള്‍ പരസ്യക്കാരുമായി ഫോണില്‍ ബന്ധപ്പെടുകയുണ്ടായി. മേലില്‍ ഇത്തരത്തില്‍ പരസ്യങ്ങള്‍ പതിക്കില്ലെന്ന് പലരും വിദ്യാര്‍ഥികളോട് പറഞ്ഞു. പഞ്ചായത്തിന്റെ നോട്ടീസ് കൈപ്പറ്റിയതിനുശേഷവും നീക്കംചെയ്യാത്ത ബോര്‍ഡുകളും ആണികളും സീഡ് അംഗങ്ങള്‍ നീക്കം ചെയ്തു. പഞ്ചായത്തിന്റെ വിവിധഭാഗങ്ങളില്‍ 10-ല്‍ പരം മരങ്ങളിലുണ്ടായിരുന്ന ആണികള്‍ നീക്കംചെയ്തു.